Iwwerraschend sanglech

Hëlt een den neien Album vun der Formatioun Slixs an de Grapp, kann een op den éischte Bléck net vill domat ufänken. Poppeg Faarwen, eng Silhouette vum Johann Sebastian Bach an d'Zuel 3 sinn am Mëttelpunkt. Da gesäit een den Titel vum Ensembel an och dee vum Disk "Quer Bach 3". Esou ongewéinlech de Cover, esou banal de Programm: Et ass eng Zesummestellung vu méi oder wéineger bekannten Instrumentalstécker vum Barockkomponist. Dat Besonnescht kritt een eréischt mat, wann een den Album opleet. D'Instrumentalstécker ginn nämlech gesongen.