La Marella envida ad in viadi auditiv da Samedan a Tirano ed enavos. «In siemi» numna il chau-tren Luzi Oberer ses mastergn, i dettia strusch in di ch'el n'haja betg tschaffen dad ir a lavurar. Ses pli grond plaschair è il contact cun ils osps; per el è «ses» tren sco in hotel nua che tut sto esser en urden, per che mintgin e mintgina sa sentia bain. «Jau vi guardar ch'i giaja bain cun tut mes passagiers, da la poppa en la charrotscha enfin tar il vegliet ch'è in zic pers.» Luzi Oberer, chau-tren tar la Viafier Retica En ils 37 onns ch'el lavura gia per la Retica ha il chau-tren sa chapescha pudì observar l'immens svilup tecnic dals ultims decennis. Ma tenor el n'è l'essenza da ses mastergn betg sa midada: accumpagnar ils osps cun buna luna, pazienza ed umor e cunzunt procurar per in viadi memorabel. Per Luzi Oberer è mintga viadi en tren numnadamain era anc oz in'aventura, durant la quala tut il pussaivel po capitar.

0 Comments Sort By